जीवन शर्माको "हजुरकै लागि हो"

नयनमाथि गाजल हजूरकै लागि हो
नजरहरू चंचल हजूरकै लागि हो

यसले जिन्दगी झन् रंगीन बनाईदिन्छ
प्याला थप्नुस् बोतल हजूरकै लागि हो

फाट्छ कि यही डर छ,संझनाको कोसेली
पछ्यौरी यो मलमल हजूरकै लागि हो

संकटभित्र सन्तुष्टि खोज्नूपर्छ भन्नूभो,
जगाएको आत्मबल हजूरकै लागि हो

भन्नेहरू गर्दैनन् रे गर्नेहरू भन्दैनन्
याद आउँछ पलपल हजूरकै लागि हो

न त प्रेम रोकियो न त प्रेम अन्त्य भयो
पलाउँछ अबिरल हजूरकै लागि हो

यतै कतै “जीवन”सँग जिन्दगी बुझ्नूछ
असफल या सफल हजूरकै लागि हो